السلام عليكم ورحمة الله وبركاته .. اذكر ايام طفولتنا في الناصفه ويامحلاها من ايام كنا نجهز نفسنا من العصر كل واحد يحمل معاه جيس المخده مالته ومن بعد اذان المغرب نطلع مباشره نفتر من اول بيت وايام قبل مو مثل الحين حتى الاطفال صار فيهم طمع البيت اللي مافيه فلوس مايقاربونه وايمنا قبل مانفوت بيت لدرجة ان الجيس اللي عندنا يزحف في الارض من ثقله ومن كثر ( السكسبال ) والمينو . ياليت ايام قبل ترجع والله انها حلوة وحلاة المرأه العجوز اذا استقبلتنا من على الباب وفي ايدها ( قفير ) سله ومخلوطه من السكسبال والنقل والحلاوة واذكر ومن بعد الفره الطويله اللي من المغرب الى حدود الساعة العاشره مساءً بعدما نرجع البيت الوالده حفظها الله تجهز لنا ( صنيه ) ننثر فيها المحصول وننبش فيه نطلع لفلوس اللي حصلناها وكان يصير تحدي بينا احنا لصبيان من يحصل اكثر وكان اكبر مبلغ نحصله تقريبا من الدينار ونصف الى دينارين وهالمبلغ بالنسبة لنا في ذاك الاوان كان مبلغ كبير علينا . يمكن يلفت انتباهكم شلون كنا نناصف في جيس مال مخده !! لان في ايامنا ماكان في محلات تبيع اجياس مثل الحين وحتى كنا نستخدم نوع من الاجياس يسمونه ( جنته ) يمكن غريبه عليكم هالمسميات بس حقيقه كانت الناصفه قبل لها ذوق وطعم . وفي النهاية اقول لكم متباركين بمولد الامام الحجه ( ع ) وبالناصفه وتنعاد عليكم كل سنه ان شالله وتقبلو تحياتي اخوكم \ المساااافر رااااح
موضوع: الــنـــاصـــفـــه. 
السبت أغسطس 16, 2008 12:06 am
